പാളയം-കരിപ്പാലി റോഡ് തകർന്നു യാത്ര അപകടഭീതിയിൽ.

വടക്കഞ്ചേരി: പാളയം-കരിപ്പാലി റോഡിലൂടെ വാഹനമോടിക്കണമെങ്കിൽ നല്ലൊരു അഭ്യാസിയാകേണ്ടിവരും.കുഴികളിൽ വീഴാതെ വെട്ടിച്ചും കുഴിയിലകപ്പെട്ടാൽ വാഹനത്തിന്റെ നിയന്ത്രണം നഷ്ടപ്പെടാതെയും പെടാപ്പാടുപെട്ടാണ് യാത്രക്കാർ രണ്ടുകിലോമീറ്റർ കടക്കുന്നത്. ഇരുചക്രവാഹനയാത്രികർക്കാണ് കൂടുതൽ ഭീഷണി. ഏതുനിമിഷവും നിയന്ത്രണം തെറ്റി വീഴും.അഞ്ച് വർഷത്തിലേറെയായി യാത്രക്കാർ ഈ ദുരിതം സഹിക്കുന്നു. റോഡ് ഉടൻ നവീകരിക്കുമെന്ന് ഇടയ്ക്കിടെ വാഗ്ദാനങ്ങൾ നൽകുന്നതല്ലാതെ പണി നടന്നില്ല. ഒക്ടോബറിൽ കിഴക്കഞ്ചേരി-ചിറ്റടി റോഡിലുള്ള മമ്പാട് പാലം പുനർനിർമാണത്തിനായി പൊളിച്ചതോടെ ബദൽവഴിയായ പാളയം-കരിപ്പാലി റോഡിലൂടെയാണ് വാഹനങ്ങൾ പോകുന്നത്.വടക്കഞ്ചേരി ടൗണിൽനിന്ന് മംഗലം-ഗോവിന്ദാപുരം സംസ്ഥാന പാതയിലേക്ക് കടക്കുന്ന എളുപ്പവഴിയായതിനാൽ ചെറു ചരക്കുവാഹനങ്ങളും ഇതുവഴി പോകുന്നുണ്ട്. രണ്ടായിരത്തോളം വിദ്യാർഥികൾ പഠിക്കുന്ന സെയ്ന്റ് ഫ്രാൻസിസ് സ്‌കൂളും ഈവഴിയിലാണ്.സൈക്കിളിൽ വരുന്ന വിദ്യാർഥികൾ ഇളകിക്കിടക്കുന്ന കല്ലിൽ കയറി തെന്നിവീഴുന്നത് പതിവായിരിക്കുകയാണ്.വടക്കഞ്ചേരി, കിഴക്കഞ്ചേരി, വണ്ടാഴി പഞ്ചായത്തുകളിലൂടെ കടന്നുപോകുന്ന റോഡാണിത്.