വടക്കഞ്ചേരി മേഖലയിൽ പട്ടാപ്പകൽ വീണ്ടും മോഷണം; വയോധികയുടെ മാല കവർന്ന മോഷ്ടാവിനെ നാട്ടുകാർ കൈയ്യോടെ പിടികൂടി.

വടക്കഞ്ചേരി: കണ്ണമ്പ്ര ചല്ലിപറമ്പിൽ വയോധികയുടെ മാല കവർന്ന മോഷ്ടാവിനെ കൈയ്യോടെ പിടികൂടി നാട്ടുകാർ പോലീസിനെ ഏൽപ്പിച്ചു. തൃശൂർ കുറ്റൂർ പാമ്പൂർ സ്വദേശി പെരുമനത്ത് വീട്ടിൽ ശ്രീകുമാർ (39) ആണ് പിടിയിലായത്. ഇന്ന് വൈകുന്നേരം അഞ്ച് മണിയോടു കൂടിയാണ് സംഭവം. ചല്ലിപറമ്പ് കുഞ്ചുവിൻ്റെ ഭാര്യ ദേവു (70) ൻ്റെ മൂന്ന് പവനോളം വരുന്ന മാലയാണ് നഷ്ടപ്പെട്ടത്.

റോഡരികിലൂടെ നടന്ന് പോവുകയായിരുന്ന ദേവുവിൻ്റെ മാല സ്കുട്ടിയിൽ എത്തിയ യുവാവ് കവരുകയായിരുന്നു. ഇവിടുന്ന് രക്ഷപെട്ട ഇയാൾ ചുവട്ടുപാടം ചേകോഡ് വച്ചാണ് നാട്ടുകാരുടെ പിടിയിലായത്. പ്രതിയെ നാട്ടുകാർ പിടികൂടിയതിന് ശേഷം പൊലീസിന് കൈമാറി. കഴിഞ്ഞ മാസം പന്നിയങ്കരയിൽ സമാന രീതിയിലുള്ള മോഷണം നടന്നിരുന്നു. ആ കേസിലും പ്രതിക്ക് പങ്കുണ്ടെന്നാണ് സൂചന.