കരിപ്പോട് ലെവല്‍ക്രോസ് റോഡ് നവീകരിച്ച്‌ സഞ്ചാരയോഗ്യം ആക്കണമെന്ന ആവശ്യം ശക്തം.

പുതുനഗരം: കരിപ്പോട്-പല്ലശന പാതയിലെ റെയില്‍വേ ലെവല്‍ ക്രോസില്‍ തുടർഗർത്തങ്ങളും മെറ്റല്‍ പരന്നു കിടക്കുന്നതും വാഹനസഞ്ചാരം ദുഷ്കരമാക്കി. കാല്‍നടയാത്രക്കാർ പോലും വീഴുന്നത് പതിവാണ്. പല്ലശന കാവിലേക്ക് ചൊവ്വ, വെള്ളി, ഞായർ ദിവസങ്ങളില്‍ ക്ഷേത്രദർശനത്തിനായി കോയമ്പത്തൂർ-പൊള്ളാച്ചി ഭാഗങ്ങളില്‍ നിന്നും നൂറുകണക്കിനു കാറുകള്‍ എത്താറുണ്ട്.

ലെവല്‍ ക്രോസ് ഗർത്തത്തില്‍ മറികടക്കുന്നതിനിടെ വാഹനങ്ങള്‍ക്ക് യന്ത്രതകരാറുണ്ടാകുന്നതും ടയറുകള്‍ പഞ്ചറാകുന്നതും തീരാദുരിതമാണ്. പതിനഞ്ചു മീറ്ററോളം റോഡ് റെയില്‍വേ അധികാര പരിധിയിലുള്ളതാണ്.

ഇക്കാരണത്താല്‍ തദ്ദേശസ്വയം ഭരണ സ്ഥാപനങ്ങള്‍ക്ക് ഈ പ്രശ്നത്തില്‍ ഇടപെടാൻ കഴിയാത്ത അവസ്ഥയാണുള്ളത്. ട്രെയിൻ എത്തുന്ന സമയത്ത് വാഹനങ്ങള്‍ കുടുങ്ങിയാല്‍ അപകടസാധ്യതയുമുണ്ട്.