അടിപ്പെരണ്ടയിൽ നിന്നും കാണാതായ ഉമ്മർ ഫാറൂഖിന്റെ മൃതദേഹം കണ്ടെത്തി.

നെന്മാറ: അടിപ്പെരണ്ടയിൽ നിന്നും കാണാതായ മണ്ണാംകുളമ്പ് എ. ഉമ്മർ ഫാറൂഖ് (45)ന്റെ മൃതദേഹം കണ്ടെത്തി. മൃതദേഹം മംഗലംഡാമിന് സമീപമുള്ള വീഴ്ലി പുഴ പാലത്തിനടിയിൽ നിന്നുമാണ് കണ്ടെത്തിയത്. കഴിഞ്ഞ ശനിയാഴ്ചയാണ് ഉമ്മർ ഫാറൂഖിനെ കാണാതായത്. തുടർന്ന് ഇത്രയും ദിവസം നാട്ടുകാരുടെയും, ഫയർഫോഴ്സിന്റെ നേതൃത്വത്തിൽ പുഴയുടെ പല ഭാഗങ്ങളിലും തിരച്ചിൽ നടത്തിയിരുന്നു. ഒടുവിൽ ഇന്ന് രാവിലെയാണ് വീഴ്ലി പാലത്തിന്റെ അടിയിൽ നിന്ന് മൃതദേഹം കണ്ടെത്തിയത്.

അടിപ്പെരണ്ട പുഴയിൽ വെള്ളം ഉയരുമ്പോൾ ഉമ്മർ ഫാറൂഖ് തേങ്ങ പിടിക്കാൻ പോകാറുള്ളതായി ബന്ധുക്കൾ പറഞ്ഞിരുന്നു. ഇതിന്റെ അടിസ്ഥാനത്തിൽ ശനിയാഴ്ച വൈകീട്ട് പുഴയോരത്ത് പരിശോധന നടത്തിയിരുന്നു. ഞായറാഴ്ച കൊല്ലങ്കോട് അഗ്നിരക്ഷാസേനയും, നെന്മാറ പോലീസും, പ്രദേശവാസികളും ചേർന്ന് പുഴയുടെ വശങ്ങളിൽ തിരച്ചിൽ നടത്തിയിരുന്നു. പള്ളത്താമടയിലെ തോട്ടത്തിനോട് ചേർന്ന് ചെരുപ്പുകൾ കണ്ടെത്തി.

ഇതോടെയാണ് അടിപ്പെരണ്ട പുഴയും, ഒലിപ്പാറ പുഴയും ചേരുന്ന അഞ്ചു കിലോമീറ്റർ ദൂരെയുള്ള രണ്ടൂട്ടിവരെ തിരച്ചിൽ നടത്തിയത്. നെല്ലിയാമ്പതി മലനിരകളിൽ നിന്ന് മഴ പെയ്ത് കൂടുതൽ വെള്ളം വന്ന് പുഴകളിൽ ശക്തമായ കുത്തൊഴുക്കുണ്ടായിരുന്നതിനാൽ തിരച്ചിൽ ഏറെ ബുദ്ധിമുട്ടായിരുന്നു. ഒടുവിൽ ഇന്ന് രാവിലെയാണ് വീഴ്ലി പാലത്തിന്റെ അടിയിൽ നിന്ന് മൃതദേഹം കണ്ടെത്തിയത്.