നീർനായ്ക്കളുടെ ശല്യത്തിൽ വലഞ്ഞ് മ​ത്സ്യം വളര്‍​ത്ത​ല്‍ തൊഴിലാളികൾ.

മം​ഗ​ലം​ഡാം : മം​ഗ​ലം​ഡാം റിസ​ര്‍​വോ​യ​റി​ലെ മ​ത്സ്യം വളര്‍​ത്ത​ല്‍ തൊ​ഴി​ലാ​ളി​ക​ള്‍ നിത്യവൃ​ത്തി​ക്ക് വ​ക കണ്ടെത്താ​നാ​കാ​തെ ദു​രി​ത​ക​യ​ത്തി​ല്‍. റി​സ​ര്‍​വോ​യ​റി​ല്‍ നീ​ര്‍​നാ​യ്ക്ക​ള്‍ പെ​രു​കി​യ​താ​ണ് ഫി​ഷ​റീ​സ് വ​കു​പ്പി​നു കീ​ഴി​ലു​ള്ള പ​ട്ടി​ക​ജാ​തി വ​ര്‍​ഗ്ഗ സ​ഹ​ക​ര​ണ സം​ഘ​ത്തി​ലെ തൊ​ഴി​ലാ​ളി​ക​ള്‍​ക്ക് ജീ​വി​ക്കാ​ന്‍ ക​ഴി​യാ​ത്ത സ്ഥി​തി​യു​ണ്ടാ​ക്കു​ന്ന​ത്. അ​മ്പ​തും അ​റു​പ​തും എ​ണ്ണം വ​രു​ന്ന വ​ലി​യ കൂ​ട്ട​ങ്ങ​ളാ​ണ് ഡാ​മി​ന്‍റെ പ​ല ഭാ​ഗ​ങ്ങ​ളി​ലാ​യു​ള്ള​ത്. തൊ​ഴി​ലാ​ളി​ക​ള്‍ വൈ​കീ​ട്ട് വ​ല​യി​ട്ട് പി​ന്നെ പി​റ്റെ ദി​വ​സം പു​ല​ര്‍​ച്ചെ മീ​ന്‍ ശേ​ഖ​രി​ക്കാ​ന്‍ ചെല്ലു​മ്പോള്‍ വ​ല ക​ടി​ച്ച്‌ മു​റി​ച്ച്‌ വ​ലി​യ ദ്വാ​ര​ങ്ങ​ളാ​ക്കി​യി​ട്ടു​ണ്ടാ​കും. മ​ത്സ്യ​ങ്ങ​ളെ​ല്ലാം നീ​ര്‍ നാ​യ്ക്ക​ള്‍ തി​ന്ന് തീ​ര്‍​ത്ത് കു​റച്ച്‌ മു​ള്ളും മ​റ്റു അ​വ​ശി​ഷ്ട​ങ്ങ​ള്‍ മാ​ത്ര​മെ ശേ​ഷി​ക്കു എന്നാ​ണ് തൊ​ഴി​ലാ​ളി​ക​ള്‍ പ​റ​യു​ന്ന​ത്.

നീ​ര്‍​നാ​യ്ക്ക​ളു​ടെ തീ​റ്റ​ക്കാ​യി മ​ത്സ്യം വ​ള​ര്‍​ത്തു​ന്നതു പോ​ലെ​യാ​യി ഡാ​മി​ലെ മ​ത്സ്യ​ക്കൃ​ഷി​യെ​ന്ന് സം​ഘം പ്രസി​ഡ​ന്‍റ് ച​ന്ദ്ര​ന്‍ പ​റ​യു​ന്നു. എ​ട്ട് കി​ലോ വ​രെ തൂ​ക്കം വ​രുന്ന ക​ട്ട്ല​ പ്പോ​ലെ​യു​ള്ള മത്സ്യ​ങ്ങ​ളാ​ണ് നീ​ര്‍​നാ​യ്ക്ക​ള്‍ വ​ല ക​ടി​ച്ച്‌ കീ​റി അ​ക​ത്താ​ക്കു​ന്ന​ത്. ആ​റ്, ഏ​ഴ് വ​ര്‍​ഷം മുമ്പ് വി​ര​ലി​ലെ​ണ്ണാ​വു​ന്ന​വ മാ​ത്ര​മായി​രു​ന്ന​ത് ഇ​പ്പോ​ള്‍ എ​ണ്ണാന്‍ ക​ഴി​യാ​ത്ത വി​ധം പെ​രുകി. നീ​ര്‍​നാ​യ്ക്ക​ളെ പി​ടി​കൂടി മ​റ്റെ​വി​ടേ​ക്കെ​ങ്കി​ലും മാ​റ്റ​ണ​മെ​ന്നാ​വ​ശ്യ​പ്പെ​ട്ട് വ​നം വ​കുപ്പി​നും പ​ഞ്ചാ​യ​ത്ത് അ​ധികൃ​ത​ര്‍​ക്കു​മെ​ല്ലാം പ​ല ത​വണ നി​വേ​ദ​നം ന​ല്‍​കി​യി​രു​ന്നെ​ങ്കി​ലും ന​ട​പ​ടി​ക​ളു​ണ്ടാ​യി​ല്ല.

വം​ശ​നാ​ശ ഭീ​ഷ​ണി​യി​ല്‍​പ്പെ​ട്ട ഇ​ന​മാ​യ​തി​നാ​ല്‍ നീ​ര്‍​നാ​യ്ക്ക​ളെ മാ​റ്റാ​നാ​കി​ല്ലെ​ന്ന നി​ല​പാ​ടി​ലാ​ണ് വ​നം വ​കു​പ്പ്. ഡാ​മി​ല്‍ നേ​ര​ത്തെ​യൊ​ന്നും ഇ​വ ഉ​ണ്ടാ​യി​രു​ന്നി​ല്ല. ഡാ​മി​ല്‍ ഇ​വ എങ്ങ​നെ​യെ​ത്തി എ​ന്ന​തും ദു​രൂ​ഹ​മാ​ണ്. ഡാ​മി​ലെ മ​ത്സ്യം വള​ര്‍​ത്ത​ല്‍ പ​ദ്ധ​തി വ​ഴി​യാ​ണ് സം​ഘ​ത്തി​ല്‍​പ്പെ​ട്ട 52 കു​ടും​ബ​ങ്ങ​ള്‍ ക​ഴി​ഞ്ഞി​രു​ന്ന​ത്. എ​ന്നാ​ല്‍ വ​രു​മാ​നം ഇ​ല്ലാ​താ​യ​തോ​ടെ പ​കു​തി​യി​ലേ​റെ പേ​രും മറ്റു തൊ​ഴി​ലു​ക​ള്‍ തേ​ടി പോയി.​ ഇ​പ്പോ​ള്‍ 21 അം​ഗ​ങ്ങ​ളാ​ണ് സം​ഘ​ത്തി​ലു​ള്ള​ത്. ഇ​വ​ര്‍​ക്കു ത​ന്നെ രാ​പ​ക​ല്‍ അ​ധ്വാനി​ച്ചാ​ലും തൊ​ഴി​ലു​റ​പ്പി​ന്‍റെ കൂ​ലി പോ​ലും കി​ട്ടു​ന്നി​ല്ല. മൂ​ന്ന് പ​തി​റ്റാ​ണ്ടി​ലേ​റെ​യാ​യി ചെ​യ്തു​വ​രു​ന്ന തൊ​ഴി​ല്‍ എ​ന്ന നി​ല​ക്കാ​ണ് കു​റ​ച്ചു പേ​രെ​ങ്കിലും പി​ടി​ച്ചു നി​ല്‍​ക്കു​ന്ന​ത്. ഡാ​മി​ല്‍ ന​ട​ക്കു​ന്ന ചെ​ളി​നീ​ക്കല്‍ പ്ര​വൃ​ത്തി​ക​ള്‍ മൂ​ലം അടു​ത്ത ര​ണ്ട് മൂ​ന്ന് വ​ര്‍​ഷം ഇനി ഡാ​മി​ല്‍ മ​ത്സ്യ​ക്കു​ഞ്ഞു​ങ്ങ​ളെ നി​ക്ഷേ​പി​ക്കാ​നും കഴിയി​ല്ല. നീ​ര്‍​നാ​യ്ക്ക​ളു​ടെ ക​ണ്ണി​ല്‍​പ്പെ​ടാ​തെ കി​ട്ടു​ന്ന മ​ത്സ്യം രാ​വി​ലെ വി​ല്പ​ന ന​ട​ത്തി​യാ​ണ് ഇ​വ​രി​പ്പോ​ള്‍ കി​ട്ടു​ന്ന​തു കൊണ്ട് ക​ഴി​ഞ്ഞു​കൂ​ടു​ന്ന​ത്.

ര​ണ്ട് പ്ര​ള​യ​ത്തി​ല്‍ ഷ​ട്ട​റു​ക​ള്‍ പ​ര​മാ​വ​ധി ഉ​യ​ര്‍​ത്തി വെ​ള്ളം വി​ട്ട​പ്പോ​ള്‍ വ​ലി​യ തോ​തി​ല്‍ ഡാ​മി​ലെ മ​ത്സ്യ​സ​മ്പത്ത് നഷ്ടമാ​യി. മ​ണ്ണെ​ടു​ക്ക​ല്‍ കൂടു​ത​ല്‍ വ​ര്‍​ഷ​ത്തേ​ക്ക് നീണ്ടു പോ​യാ​ല്‍ ഇ​വ​രു​ടെ ദുരി​ത​ങ്ങ​ളും ഏ​റും. ഫി​ഷ​റീ​സ് വ​കു​പ്പും ര​ക്ഷ​ക്കെ​ത്തു​ന്നി​ല്ലെന്ന് ഇ​വ​ര്‍​ക്ക് പ​രാ​തി​യു​ണ്ട്. എ​ന്തെ​ങ്കി​ലു​മൊ​ക്കെ സാമ്പത്തി​ക സ​ഹാ​യം ലഭിക്കു​മെ​ന്ന് പ്രതീക്ഷിച്ചെങ്കിലും അ​തും ഉ​ണ്ടാ​യി​ല്ലെ​ന്ന് സം​ഘം പ്രസിഡന്‍റ് ച​ന്ദ്ര​ന്‍ പ​റ​ഞ്ഞു.